WebPost

સરકારને કરોડ મોઢાં હોય છે

પણ એક આત્મા હોતો નથી

સરકાર અવાજની માલિક છે

સરકાર વિચાર કરાવી શકે છે

સરકાર લેખકને લખાવી શકે છે

જાદૂગરને રડાવી શકે છે

ચિત્રકારને ચિતરાવી શકે છે

ગાયકને ગવડાવી શકે છે

કલાકારને કળા કરાવી શકે છે

એક હાથે તાળી પડાવી શકે છે

રવિવારને સોમવાર બનાવી શકે છે

નવી પેઢીને જૂની કરી શકે છે

જૂનીને પૈસાદાર બનાવી શકે છે

પૈસા છાપી શકે છે, ઘાસ ઉગાડી શકે છે

વીજળી વેચી શકે છે

ઈતિહાસ દાટી શકે છે

અર્થને તંત્ર અને તંત્રને અર્થ આપી શકે છે

સરકારોની ભાગીદારીમાં આ પૃથ્વી ફરે છે

સમય ફરે છે, માણસ ફરે છે

યંત્ર ફરે છે, મંત્ર ફરે છે

પણ, એક દિવસ ……

એક દિવસ ગરીબની આંખ ફરે છે

અને પછી, સરકાર ફરે છે.

– ચંદ્રકાંત બક્ષી

⇓ ⇓ આ રચના ઓડિયો સ્વરૂપે પત્રકાર દેવાંશી જોશીના અવાજમાં સાંભળો ⇓ ⇓