ખોવાયું
બાળપણનું મારૂ ફળીયું ખોવાયું,
રમતો હું એ મારૂ આંગણુ ખોવાયું.
નથી છીપાતી તરસ ફ્રીજના પાણીથી,
રસોડામા રમતું એ પાણીયારુ ખોવાયું.
બધી મળી બેડરૂમમાં મને સગવડ પણ,
મીઠી નિંદર માણતો એ ઘોડીયું ખોવાયું.
નથી આવતું લુંછવા આંસુ આજ કોઈ,
મારી માં લૂંછતી એ આજ ઓઢણું ખોવાયું
થાકી જવાય છે થોડુ જ અંતર ચાલતા હવે,
કિલોમીટર દોડાવતું એ મારૂ પૈડું ખોવાયું.
બત્રીસ ભાતના ભોજન કયાં ભાવે છે હવે,
ગોળ ઘીનું મારી બેનીનું એ ચુરમૂ ખોવાયું.
મારવા પડે છે દરેક દ્વારે ટકોરા હવે,
સીધો જાતો એ ખુલ્લું હવે બારણું ખોવાયું.
નથી ભૂંસી શકતો હવે લખેલું આ કાગળનું,
દફ્તરની એ મારી પેનને પાટીયું ખોવાયું.
હજારો દોસ્તો છે ઘાયલ ફેસબુક અને વૉટસએપમાં,
લંગોટીયા યાર સાથેનુ મારુ ગામડું ખોવાયું….